strip.png
أهم الأخبار
strip.png
الأخبار السابقة

شيكابلا فى سطور

كتب : طارق عبدربه



شوبير امبارح خرج في تصريح ناري وقال ان كل لاعبي المنتخب سجلوا تصريحات جوا المعسكر بـ ٥ الاف دولار باستثناء شيكابالا ومحمد صلاح اللي رفضوا الامر احتراماً للمعسكر وللحقوق.

بالتأكيد لاعب زي صلاح مش محتاج للمبلغ دا نهائياً وكمان اقل حرف بيخرج منه بيكون عامله دراسة مع وكيله ومحاميه لذلك مستحيل يفكر في الامر لكن شيكابالا فالموضوع مختلف نهائياً.

مرة كنت بتكلم مع مسؤول الاحتراف عندنا في النادي وهو سوري بالمناسبة، وفي الكلام جبنا سيرة شيكابالا، قالي انا بقالي هنا اكتر من ١٦ سنة مر عليا لاعيبة ومدربين من كل قارات العالم تقريبا لكن في حياتي ماشوفتش ولا هشوف لاعب زي شيكابالا، لانه اللاعب الوحيد اللي شوفته بيستحقر الفلوس ومش بيعملها اي حساب نهائيا، لما كان بيغيب او يتأخر ويتغرم نقوله عن ان ده بيقلل من مستحقاته كتير فكان يقول مش مشكلة، ولما نوى انه يمشي اقوله يابني النادي هيديك الفلوس اللي انت عايزها، اتفأجات وقالي ان رحيله ملوش علاقة بالفلوس لانها اخر همه وانها سواء كتيرة او قليلة مبتفرقش معاه خالص ولا بيحطها في حساباته.

قبل الوصل، شيكابالا كان في الزمالك وكان حديث مصر كلها انه عقده بـ ٨ مليون سنة وبم انه كان افضل لاعب في مصر وقتها كان طبيعي يكون اغلى لاعب لكن رغم كدا ظهر في النهاية ان راتبه الحقيقي ملوش اي علاقة بعقده نهائياً

لما رجع من سبورتنج لشبونة راتبه في الزمالك كان ٢٠ الف .. لاعب بقيمة وقامة شيكابالا راتبه الطبيعي بدل ما يكون ٥ مليون في سنة كحد أدنى كان بياخد٢٠ الف جنيه اللي هو تقريبا اقل من لاعيبة الدرجة التالتة بس علشان يلعب

بلال علام المعلق كان حكى موقف عن ان قبل انتقال شيكابالا للرائد، وكيل لاعبين سأله اذا كان ممكن شيكابالا يوافق على اللعب للرائد وقاله الراتب اللي هيتعرض على شيكابالا، بلال قاله الراتب ضعيف جدا ومستحيل يوافق، لكنه تفاجئ بموافقة شيكابالا والسبب انه عايز يجهز نفسه قبل كاس العالم.

اي لاعب في فترة تألقه بيحاول يستغل ده في انه يكون ثروة ليه سواء من الحوارات في البرامج والصحف او عمل إعلانات دعائية لكن شيكابالا ظل طوال حياته مقاطع الاعلام في وقت الاعلام نفسه كان بيحفي وراه لسنين حرفيا علشان ياخد منه كلمة او يعمل مكالمة لكنه كان دايما رافض ويوم ما خرج في الاعلام لقيناه في قناة الاهلي علشان يعزي الشهداء.

في حلقة رامز جلال كان سهل جدا يضحك شوية وبيهزر شوية ويعمل نفسه من بنها ويخلص ساعة تسجيل الحلقة وفِي الاخر هياخد مبلغ كبير لكنه علشان شيكابالا اللي بيعتز بنفسه بوظ الحلقة من اول دقيقة ومنفقش نفسه ولا جمهوره ولا رضي بالإهانة علشان الفلوس

وفِي النهاية يجي معسكر المنتخب يثبت انه فريد من نوعه، بين الـ ٢٣ لاعب يمكن يكون هو اقل ثروة منهم ويمكن يكون في احتياج للفلوس لكنه رفض المشاركة في مهزلة علشان فلوس، المهزلة اللي شارك فيها الحارس الثري ولاعب ارسنال وباقي محترفين اوروبا وأغنى لاعيبة في مصر

شيكابالا أتولد في أسرة فقيرة وجت له الفرصة كتير انه يعوض اللي فاته ويعمل لنفسه ثروة ضخمة بالحلال لكنه انسان شبعان وقنوع وراضي بحاله من البداية ما عملش كدا وقضى حياته زي ما يحب بدون ما يخلي كل همه الفلوس ودا نوع نادر لما تلاقيه في الزمن ده.

شيكابالا محققش انجازات كتير زي عشرات من اللاعيبة في مصر وبالعكس عمل مشاكل كتير كانت ممكن تقضي عليه او تكره الناس فيه لكن دا مش بس محصلش لكن كمان شيكابالا بقى من النوادر اللي أخدوا حب أبدي من الناس هيخليه دايما في قلوبهم وعقولهم مهما مرت السنين وهيخليهم يتابعونه ويتكلموا عنه حتى لو راح فين

حقيقة سواء بتكره او بتحب شيكابالا في أمرين متعلقين بيه مستحيل تكدبهم، الاول انه من احرف اللاعيبة اللي أنجبتها مصر والثاني انه من انظف الشخصيات اللي جت في تاريخ رياضتنا.


strip.png
الأخبار المتعلقة